شورای معینیت امور محصلان وزارت تحصیلات عالی
۱۴۰۰کال، د وږي ۱۰مه، لوړو زده کړو وزارت
د خصوصي لوړو زده کړو بنسټونو د حضوري درسونو د پیل په اړه د زده کړیالانو چارو د معینیت شورا ناسته، د دغه معینیت د سرپرست انجنیر سید اسماعیل روحاني په مشرۍ تر سره شوه.
په دغه ناسته کې چې د دولتي زده کړیالانو د چارو رییس پوهنوال انجنیر محمد شریف امین، د اکاډمیکو چارو د ارزونې او څار رییس پوهندوی دوکتور ولي محمد حنیف، د خصوصي زده کړیالانو د چارو رییس پوهندوی دوکتور خیبر سیفي او د زده کړیالانو چارو د معینیت سلاکار پوهنوال احمد ضیاء یوسفزي هم شتون درلود، د زده کړیالانو چارو د معینیت سرپرست انجنیر سید اسماعیل روحاني په دولتي او خصوصي پوهنتونونو کې د حضوري زده کړو د پیل د څرنګوالي په اړه خبرې وکړې او ویې ویل، چې ټول تحصیلي بنسټونه د اسلامي ارزښتونو په مراعاتولو مکلف دي او موږ په دې هڅه کې یو، چې ډېر ژر پوهنتونونه د زده کړیالانو پر مخ پرانیستل شي. هغه زیاته کړه، چې د کورونا ناروغۍ او همدارنګه د وروستیو بدلونونو له امله په زده کړو کې ډېر ځنډ رامنځته شو او منظم مهالوېش له خنډ سره مخ شو، چې د یاد ځنډ د جبران په پار یوې منظې چلنلارې او مهالوېش ته اړتیا ده.
انجنیر سید اسماعیل روحاني وویل، چې ټول د خصوصي لوړو زده کړو بنسټونه به د وږي په ۱۵مه نېټه، خپل حضوري درسونه پیل او د پسرلني سمېسټر د ازموینې او همدارنګه د خزاني سمېسټر لپاره د کانکور ازموینې مهالوېش به هم ډېر ژر خپور شي. د یادولو وړ ده، چې د دولتي پوهنتونونو د پیل په اړه به په نږدې راتلونکي کې پرېکړه وشي.
